Cuairt Coimiseanaidh Samhraidh 2025 BBC ALBA

Tha sealladh BBC ALBA farsaing, agus tha sinn àrd amasach. Tha sinn airson luchd-amhairc a thàladh bho air feadh Alba agus thairis, agus am brosnachadh le sgeulachdan làidir pearsanta agus suidhichidhean air leth. Tha sinn a’ lorg bheachdan sgairteil agus dàna.

Tha an gairm seo ag amas air beachdan aithriseach. Tha sinn a’ sireadh thagraidhean airson prògraman dàna is gaisgeil a thàlas luchd-amhairc farsaing – a bharrachd air beachdan a dh’fhaodas cliù a chosnadh don t-seanail. Tha càileachd a’ bhun-bheachd agus mar a thèid sin a chuir an cèill bunaiteach.

Ged nach eil co-mhaoineachadh riatanach, chuireadh sinn fàilte air beachdan le com-pàirtichean dearbhte eile, no fianais gu bheil comas sin a thàladh.

• Tha sinn a’ sireadh susbaint aithriseach a bheir buaidh. Thathas gu sònraichte a’ cur fàilte air prògraman le caractaran is sgeulachdan làidir a tha freumhaichte ann am beatha an latha an-diugh.
• Beachdaichidh sinn air sreathan cuir-seachad a tha air a bhi soirbheachail le luchd cleachdaidh.
• Chan eil sinn a’ sireadh chuspairean eachdraidheil – mura h-eil ceangal co-aimsireil ann, dòigh-obrach ùr-ghnàthach, no cothrom air co-mhaoineachadh.
• Chan eil sinn a’ sireadh thagraidhean mu thachartasan ciùil ach beachdaichidh sinn air prògraman aithriseach ciùil.

• Tha a’ chuairt seo airson susbaint a thèid a lìbhrigeadh do chlàr 2025/26 – a’ gabhail a-steach àm na Nollaige/na Bliadhn’ Ùire.
• Tha sinn a’ sireadh susbaint sònraichte, tarraingeach a sheasas a-mach an dà chuid aig prìomh amannan anns a’ chlàr loidhneach, agus air iPlayer.
• Tha fàilte air beachdan a thèid am foillseachadh air iPlayer an toiseachd. Bu chòir rudeigin sònraichte a bhith aig cridhe molaidhean iPlayer gus toirt air an luchd-amhairc tilleadh airson tuilleadh. Bu chòir prògraman a bhith sgiobalta, dàna, dathte agus eirmseach.

• Beachdaichidh sinn air molaidhean airson prògraman singilte agus sreathan goirid.
• Bidh sinn sùbailte a thaobh faid a rèir a’ bheachd fhèin.
• Beachdaichidh sinn air prògraman aithriseach singilte nas fhaide a dh’fhaodadh a bhith air an taisbeanadh ann an taighean dheilbh mus nochd iad air TBh ​loidhneach. Thathas an dùil gun tig prògraman aithriseach fada le co-mhaoineachadh no gum bi plana ionmhais co-mhaoineachaidh nan cois.

Thèid prìomhachas a thoirt do bheachdan a bheir aire do tuilleadh maoineachaidh bho leithid:

• Maoin Susbaint Craolaidh Alba Chruthachail
• Creideasan Cìse BFI

Bu chòir do mholaidhean a bhith mu dhuilleag no dhà (aig a’ char as fhaide) agus feumar iomradh a thoirt air na leanas:

• Tiotal a’ phrògraim. Bu chòir seo a bhith goirid, soilleir is tarraingeach air leithid iPlayer. Feuch an toir thu seachad fear Gàidhlig is Beurla.
• Cruth. An àireamh de phrògraman agus am faid.
• Prìs prògraim. Cosgais gach prògram agus/no an t-sreath slàn (mar a bhios iomchaidh).
• Geàrr-chunntas. Beachd a’ phrògraim gu sgiobalta.
• Susbaint. Geàrr-chunntas den sgeulachd agus bhidio le blasad de na prìomh dhaoine a bhios air an sgrion; an dòigh-obrach agus an stoidhle cruthachail. Ma tha thu a’ cur sreath thugainn, innis dhuinn dè tha tarraingeach mu dheidhinn agus carson a bhios an luchd-amhairc airson tilleadh airson barrachd.
• Dreach dealbh son iPlayer. Rudeigin tarraingeach agus grafaigeach; rud a ghlacas sùil an neach-coimhid agus a bhrosnaicheas iad coimhead?
• Dhà no trì ìomhaighean làidir
• Prìomh sgioba far-sgrion
• Meadhanan didseatach. Planaichean didseatach is sòisealta airson a’ bheachd.
• Beachd air cothroman margaidheachd

Deanaibh cinnteach gu bheil na h-eileamaidean riatanach seo anns an tagradh agaibh.

Tha sinn a’ cur fàilte air blasad air bhidio den bheachd ged nach eil sin riatanach. Ach, ma tha tàlant ùr an sàs tha ro-shealladh air bhidio deatamach.

Feuch nach cuir sibh ainmean dhaoine ris na tagraidhean agad mura deach bruidhinn riutha agus gun do sheall iad ùidh ro-làimh.

Ceann-latha airson beachdan: 21/5/25, 5f

Faodar an cothrom a thoirt airson còmhradh le coimiseanairean.

Bidh sinn ag amas air ar co-dhùnadh coimiseanaidh a dhèanamh air no ro: 11/6/25

Bu chòir tagraidhean agus ceistean sam bith mu rud sam bith sa Chuairt Coimiseanaidh seo a chur gu Claire NicDhòmhnaill agus Jennifer NicCoinnich aig: bbcalbacommissioning@bbc.co.uk