MUN CHOTHROM
Tha BBC Scotland agus BBC ALBA gu bhith ag obair còmhla ann an dòigh ùr inntinneach gus riochdachadh Gàidhlig a mhaoineachadh ann an Alba. Le maoin co-choimiseanaidh de £800k thairis air dà bhliadhna, maoinichte leis a’ BhBC agus MG ALBA, bidh na seanailean seo ag obair còmhla gus pròiseactan ùra a lorg airson luchd-amhairc fharsaing, agus a bhios rim faicinn air grunn ùrlaran mar iPlayer, YouTube, agus TBh. Bithear a’ sireadh bheachdan sa Ghàidhlig ann an gnèithean sònraichte thar dà bhliadhna le cothroman airson leasachadh tàlant cruthachail anns a’ Ghàidhealtachd is Na h-Eileanan.
Bidh a’ chiad chothrom riochdachaidh airson dràma a gheibh a’ chiad shealladh ann an riochd didseatach agus a tha ag amas air luchd-amhairc nas òige. Air am brosnachadh le na dràmathan goirid soirbheachail aig BBC Scotland, Float agus Dog Days, a choisinn duais dràma bho Chomann Telebhisean Rìoghail na h-Alba am-bliadhna, bidh na dràmathan didseatach seo mu dheich mionaidean a dh’fhaid agus air foillseachadh air BBC iPlayer agus YouTube BBC ALBA. Às dèidh ùine leasachaidh, bithear ag amas gum bi am pròiseact soirbheachail air a riochdachadh ann an 2025.
Thig cothroman airson beachdan aithriseach is cur-seachad nas fhaide air adhart sa bhliadhna.
Tha an cothrom seo ag amas air sgil riochdachaidh a thogail agus tàlant òg le Gàidhlig a bhrosnachadh air a’ Ghàidhealtachd agus anns na h-Eileanan.
COTHROM AIRSON DRÀMA ÙR DIDSEATACH SA GHÀIDHLIG
Tha BBC ALBA agus BBC Scotland a’ sireadh bheachdan airson sreath dràma ùr ann an cruth goirid a bhios ag amas air luchd-amhairc nas òige air làraich didseatach. Ann an cruth coltach ri na dràmathan goirid soirbheachail aig BBC Scotland mar Float agus Dog Days, a choisinn duais dràma bho Chomann Telebhisean Rìoghail na h-Alba am-bliadhna, bu chòir dha na beachdan dràma didseatach a bhith mar sreath de dh’irisean goirid de dheich mionaidean a dh’fhaid ag amas gu sònraichte air BBC iPlayer agus seanail YouTube BBC ALBA.
Tha sinn fosgailte do raon fharsaing de bheachdan thar gnèithean drama eadar-dhealaichte. Bu chòir sgeulachdan a bhith sgiobalta, a’ greimeachadh an luchd-amhairc bhon toiseachd, a’ dèiligeadh ri cuspairean a tha iomchaidh do luchd-amhairc eadar 16-24 bliadhna a dh’aois. Ge bith an e sgeulachd mu bhith a’ fàs suas, cuspair oillteil, ficsean saidheansail no romansach, bu chòir riochdairean a bhith soilleir ciamar a bheir a’ bheachd aca buaidh ann am margaidh dràma òigridh fharpaiseach. Ged a tha sinn a’ cur fàilte air eirmseachd, chan eil sinn a’ coimhead airson comadaidh sitcom no taisbeanaidhean stèidhichte air sgeidse san t-seadh àbhaisteach.
Chan eil an cothrom dràma seo a’ toirt taic do sgeulachdan fa-leth no monologan agus bu chòir dhan a’ bheachd a bhith stèidhichte air sreath irisean, le dùbhlain agus caractaran tarraingeach a bhios sinn airson leantainn gu deireadh. Beachdaichidh sinn, ge-tà, air dòighean-obrach is stoidhle a thaobh tachartasan a tha a’ tighinn ri buidseat didseatach leithid clàradh gun stad, dràmathan air am filmeadh air fòn-làimhe, Dogme 95 msaa (ged a tha stoidhle telebhisean nas traidiseanta iomchaidh cuideachd!)
Tha sinn a’ miannachadh tàlant Gàidhlig a leasachadh agus mar sin feuch an cùm sibh seo na ur cuimhne nuair a choimheadas sibh air an tàlant air-sgrion agus far-sgrion a tha an sàs ann a bhith a’ cruthachadh agus a’ toirt a’ bheachd gu buil. Tha dàimh dha rìreabh ri dualchas agus cànan cudromach. Chan eil sinn a’ sireadh bheachdan a chaidh an cruthachadh bho thùs sa Bheurla, no a dh’fheumas an eadar-theangachadh. Ach ghabhadh sinn ri co-obrachadh eadar sgrìobhadairean Gàidhlig agus Beurla.
Bu chòir tagraidhean a thighinn tro chompanaidh riochdachaidh Albannach ach feumaidh iad innse gu soilleir mar a tha an tairgse a’ toirt taic do leasachadh tàlant agus riochdachadh air Ghàidhealtachd is Eileanan na h-Alba.
Thèid prìomhachas a thoirt do phròiseactan aig a bheil tàlant cruthachail (sgrìobhadairean, stiùirichean, riochdairean) taobh a-staigh, no às, an sgìre.
Bheir sinn cuideachd cuideam gu pròiseactan anns a bheil dhà no barrachd de na h-eileamaidean a leanas air a’ Ghàidhealtachd is na h-Eileanan.
Chuireadh sinn fàilte air com-pàirteachasan eadar companaidhean riochdachaidh mura bheil fear dhiubh stèidhichte air a’ Ghàidhealtachd is na h-Eileanan.
Mas e sgrìobhadair Gàidhlig a th’ annaibh aig a bheil ùidh sa chothrom seo ach nach eil cinnteach ciamar a nì sibh ceangal ri companaidhean riochdachaidh, cuiribh post-d gu Bill Macleòid – bill.macleod@mgalba.com – airson taic.
Faodaidh sgeama cànain measgaichte a bhith aig na prògraman, ach bu chòir gum biodh a’ Ghàidhlig na prìomh chànan an-còmhnaidh.
Tha dràma didseatach na ghnè le prìs ìosal, eadar £3k-£4k gach mionaid, agus bhiodh sinn an dùil gun toireadh riochdairean cumadh air am beachdan agus meud an sgioba lìbhrigidh dha rèir – no trusadh luchd-maoineachaidh a bharrachd gus am buidseat riochdachaidh iomlan àrdachadh.
Bu chòir geàrr-chunntas de bheachdan a chur a-steach ro 6/1/25. Thèid leasachadh cuid de phròiseactan a mhaoineachadh ro cho-dhùnadh riochdachaidh as t-Earrach 2025. Feuch an cuir sibh a-steach fiosrachadh mun sgrìobhadair agus sampall sgrìobhaidh sa Ghàidhlig le tar-sgrìobhadh Beurla.
Bu chòir tagraidhean a chur gu gaelicdigitalcommissioning@bbc.co.uk
Tha an cothrom seo mar phàirt de ghealladh dà-bhliadhna bho BBC Scotland agus BBC ALBA gus taic a thoirt do chothroman riochdachaidh Gàidhlig le tuilleadh chothroman aithriseach is cur-seachad rin ainmeachadh nas fhaide air adhart sa bhliadhna.
