BBC ALBA Cuairt Coimiseanaidh Clàr Ceann Bliadhna / Earraich 2022/23

Mu

’S e seanail àrd-amasach, a bhuineas don là an-diugh agus don là a-màireach a th’ ann am BBC ALBA leis a’ Ghàidhlig aig a cridhe: ar daoine, ar cànan, ar cultar, ar saoghal. Tha ar sealladh farsaing agus tha sinn airson sgeulachdan innse a thogas ùidh is aire choimhearsnachdan air feadh Alba agus air feadh an t-saoghail.

Tha co-bhanntachd BBC ALBA pròiseil de na co-bhanntachdan cruthachail a leasaich sinn thar nam bliadhnaichean. Thathas a’ coimhead air adhart ri togail orra sin gus tuilleadh shusbaint a bheir buaidh gu h-ionadail is gu h-eadar-nàiseanta a dheasachadh.

Tha e cudromach dhuinne gu bheil na sgeulachdan a tha sinn ag innse agus na daoine a tha dhan toirt beò, mar sgàthan air farsaingeachd beatha ar luchd-amhairc.

Tha sinn airson greimeachadh air gach goireas a th’ againn, is ur spionnadh cruthachail agus ur lèirsinn teicnigeach an cois sin, gu buannachd ar luchd-amhairc. Cuiridh sinn fàilte air tagraidhean a tha a’ toirt ionmhais a bharrachd nan cois air neo aig am bheil comas sin a dhèanamh.

Tha a’ chuairt seo gu sònraichte airson tagraidhean is urrainn a lìbhrigeadh agus a choileanadh ro dheireadh a’ Mhàirt 2023 air a’ char as fhaide.

Cinn-Là

Ceann-là airson beachdan – Dihaoine 12 Lùnastal 2022, 1f.
Ceann-là airson co-dhùnaidhean – Dihaoine 26 Lùnastal 2022, 1f

Bu chòir na tagraidhean agaibh agus ceistean mu nì sam bith anns a’ chuairt coimiseanaidh seo a chur gu Jennifer NicCoinnich: jennifer.mackenzie@bbc.co.uk

Prìomhachasan Clàr Ceann Bliadhna / Earraich

Mar a tha sinn a’ dèanamh ar slighe a-mach às a’ phandemic agus a-nise dùbhlain às ùr a’ nochdadh mu choinneimh dhaoine nam beatha làitheil , is e glè bheag a tha mar a bha. Ach chan eil lagachadh a’ tighinn air miann ar luchd-amhairc airson prògraman a dhùisgeas mac-meanmna agus a bhrosnaicheas inntinn.

Tha luchd-amhairc a’ sireadh stuthan a mhisnicheas agus a bheir stiùir dhaibh, ach tha iarrtas ann cuideachd airson cur-seachad agus toil-inntinn.

Tha sinn a’ sireadh bheachdan a bheir sgeulachdan làidir chun na sgrion, a tharraingeas aire gu nàiseanta agus nas fharsainge, air an innse le liut agus brìgh, a thèid a mholadh agus a chosnas duaisean. Seasaidh sinne còmhla ribh ann a bhith a’ feuchainn ri na h-amasan sin a choileanadh.

Smaoinich air…

Sgeulachdan a tha a’ ceangal ri ar beatha ann an Alba an-diugh is docha le fhreumhaichean nar n-eachdraidh, is docha a bhuineas dhan mhionaid uaireach seo. Sgeulachdan buadhmhor a bhiodh air an sgeadachadh tro chruthan aithriseach.

Sgeulachdan fiosrachail a thogas inntinn a tha mar sgàthan air ar beatha an-diugh ann an Alba, a tha ag aithneachadh meud beatha nan Gàidheal agus a bhios tarraingeach don choimhearsnachd Ghàidhlig, ge bith dè an aois. Dh’iarradh sinn tagraidhean fhaicinn a tharraingeas daoine còmhla, a thogas dàimh leis an luchd-amhairc agus a leudaicheas ar lèirsinn. Tha ùidh againn an dà chuid ann am beachdan is urrainn a choileanadh mar shreathan air neo a sheasadh leotha fhèin.

Stiùireadh

Is fhiach smaoineachadh air na nithean seo ann a bhith a’ cruthachadh thagradh:

Dè na h-amasan a th’ agad airson a’ phròiseict seo?
Cò dha a tha e?
Ciamar a shuidheas e anns a’ chlàr an ceann 6 mìosan air neo bliadhna bhon dràsta?
Dè a’ bhuaidh a bheir an àrainneachd-obrach ùr seo air an dòigh sa bheil thu ag innse an sgeulachd?
Dè mu dheidhinn a ghlacas aire an luchd-amhairc?
A bheil am beachd seo a’ toirt sealladh air an t-saoghal mar a tha e?
Eil e mar sgàthan air farsaingeachd ar coimhearsnachdan?
Dè tha ùr ann? A bheil e ùr-ghnàthasach a thaobh lìbhrigeadh, cumadh, tàlant, teicneòlas no an taobh bho bheil an sgeulachd ga h-innse?
An gabh an sgeulachd grèim air daoine, a’ dùsgadh co-fhaireachdainn air neo deasbad, agus a bheil susbaint innte a chumas aire dhaoine fad a’ phrògraim?
An toir e uinneag do dhaoine air suidhichidhean air neo àiteachan nach fhaiceadh iad gu h-àbhaisteach?
A bheil an cumadh a thaobh fad, tàlant agus fòrmat a’ freagairt air an luchd-amhairc agus an sgeulachd?
Dè a tha e a’ cur ri farsaingeachd an deilbh a tha ri fhaicinn anns an sgàthan aig BBC ALBA?
A bheil cothrom an cois na sgeòil airson co-mhaoineachaidh a shireadh bho bhuidhnean ann am Breatainn air neo thall thairis mu choinneimh a’ phròiseict?
Dè na cothroman a th’ ann dreach a chur air an sgeulachd airson a h-innse no a putadh air ùrlaran didseatach cho math ri telebhisean? Bheil structair na sgeòil a’ freagairt air cruthan nas giorra?

Tagraidhean

Thoir dhuinn iomradh goirid cruthachail le fios mun phrìomh thàlant air beulaibh agus air cùlaibh a’ chamara agus cuideachd am buidseat a th’ ann. Cha bu chòir don seo a bhith nas fhaide na aon duilleag A4 gach prògram.
Bidh sinn cuideachd a’ coimhead airson dearbhadh gu bheil an riochdaire air smaoineachadh air mar a thogadh iad ùidh luchd-amhairc anns a’ phrògram tro phàipearan-naidheachd, na meadhanan sòisealta agus meadhanan-craolaidh eile.
Cuiridh sinn fàilte air blas de na prògraman ged nach eil seo riatanach.
Dh’fhaodadh gun tèid agallamhan a chumail leis an luchd-tagraidh gus na tagraidhean a leasachadh.
Thèid prìomhachas a thoirt do thagraidhean a tha a’ toirt feart air cothroman airson maoineachadh a bharrachd leithid, ach chan e a-mhàin, iad seo:

Maoin Susbaint Craolaidh Alba Chruthachail

Creideasan Cìse BFI

Bu chòir do thagraidhean co-riochdachaidh a tha a’ sireadh prìomh mhaoineachaidh bho cho-bhanntachd MG ALBA/BBC iarrtas a chur airson maoineachadh tro na cuairtean coimiseanaidh seo.

Clàr Ceann Bliadhna / Earraich

Ceann-là airson beachdan – Dihaoine 12 Lùnastal 2022, 1f.
Ceann-là airson co-dhùnaidhean – Dihaoine 26 Lùnastal 2022, 1f

Bu chòir na tagraidhean agaibh agus ceistean mu nì sam bith anns a’ chuairt coimiseanaidh seo a chur gu Jennifer NicCoinnich: jennifer.mackenzie@bbc.co.uk