News Naidheachdan

10 Dùbhlachd 2013

MG ALBA A’ GEALLTAINN SEALLADH CRUTHACHAIL A THAOBH RIOCHDACHADH PHRÒGRAMAN

Thuirt Dòmhnall Caimbeul, Àrd-Oifigear MG ALBA, gun robh BBC ALBA a’ leantainn air adhart a’ faighinn taic làidir bhon dà chuid riaghaltas na h-Alba agus Bhreatainn agus gun tèid a h-uile oidhirp a dhèanamh gu bhith a’ leasachadh phrògraman na seanail.

Thuirt e: “Tha MG ALBA a’ cur fàilte chridheil air an naidheachd an t-seachdain seo nach bi am £1 millean nota a bharrachd de maoineachadh a chaidh a ghealltainn le Riaghaltas Bhreatainn am measg nan gearraidhean buidseit a chaidh fhoillseachadh agus tha seo a’ sealltainn an dealas a tha ann a thaobh BBC ALBA. Tha sinn air taic làidir fhaighinn cuideachd bho Riaghaltas na h-Alba agus tha sinne a tha an-sàs san t-seanail gu làitheil dha-rìribh mothachail gu feumar dòighean cruthachail agus ùr-ghnàthach a lorg gus an fheum as fheàrr a dhèanamh den airgead. Tha sinn a’ coinneachadh ris an dùbhlan a tha seo le bhith a’ leantainn oirnn a’ dèanamh phrògraman anns an dòigh a tha air dearbhadh thar nan còig bliadhna a chaidh seachad gu bheil sinn air cur gu mòr ri craoladh, agus nas cudromaiche buileach, a tha air a bhith air leth tarraingeach do luchd-amhairc.”